揸槍搵食嘅除咗可以係差人，仲可以係路人。星期六朝早，上水就有市民發現有呀叔係小食店入面同店主嘈交，特別嘅係呀叔講講下係袋入面掏咗把槍出嚟。市民楊小姐星期六朝早9點幾，係上水新發街附近準備返工，點知係一間小食店外面遇到呢幕奇景。

「當時個呀叔指住店入面鬧，之後行埋入去」楊小姐話有個約70歲嘅呀叔，同小食店店主發生爭執，因為都幾大聲吸引唔少人注目，突然呀叔一手拎出一支槍放咗腰後，另一手指罵店主。楊小姐話由於對話內容粗口橫飛，都聽唔到係咪為食物起爭拗，定私人恩怨，不過就嚇到店入面啲食客雞飛狗走。

不過店主不但冇被嚇到，仲大聲同返呀叔講，「你唔好走呀，我報警呀」。而呀叔同樣不甘示弱，仲拋話叫店主報警囉。爭持咗約10分鐘後，到最後呀叔見勢色唔對離開，當街手揈揈，口嗡嗡拎住枝槍行過馬路，仲邊行邊講粗口，又話「打劫港幣呀你」，毫無遮掩嘅意圖，然後放入袋入面。至於途人們一啲都唔懼怕，反而係投以奇怪嘅目光居多。

你敢爆，我敢獎！ 即Call《蘋果》24小時爆相爆片熱線 ：63836568