眨吓眼，又過年。人哋同我拜年講恭喜發財，我阿利就話最緊要身體健康。幾廿歲人，重使乜發財，梗係要無病無痛，如果成日出入醫院，幾多錢都冇癮。
過年香港人最鍾意出埠。不過，新正頭其實香港會多咗好多會計佬就真。點解？𠵱家鬼咁多會計師長駐內地，唔單止北京上海呢啲大城市，二線城市例如杭州福州，再僻一啲例如昆山徐州，一樣有大把我舊時啲同行喺度駐紮。內地過年放假寧舍長，呢班外放嘅奴隸，一定趁機返香港見見老竇老母，昅昅自己間負資產。就算去旅行，都會等放完紅假，啲人潮返晒嚟，先至出門，唔使同人迫之餘，又可以平啲，會計佬就係咁孤寒。
放完假返嚟，梗係重有大把嘢做。嗰啲上市呀、收購呀，一定繼續，不過各位外行人就未必有興趣，話晒都係細眉細眼。不過，有樣行業改革就係好多行家想做，大家可能有興趣。

呢樣就係引入有限責任合夥人制度。律師會計師大多數都係合夥人制，一個合夥人唔生性，成間行都俾佢撬起。所以大行要升合夥人，都要睇清睇楚，差在未做品格審查。雖然會計師行𠵱家可以有限公司經營，但專業保費是另一條數，目前為止，未算太流行。
尤其是家陣咁多高風險嘅內地公司生意，一個唔好彩，接咗間老總被扣查嘅民企國企，隨時賺埋唔夠賠。要啲老老實實嘅老嘢，同啲博上位嘅後生仔陪葬，咁就唔抵啦！所以話，如果搞得掂呢單嘢，會計佬就可以叠埋心水搵銀，不問世事。要搞和諧，要搞經濟，呢招係絕招。