Marvel嘅超級英雄電影近幾年越嚟越強勢，雖然老對手DC先後推出咗《神奇女俠》、《正義聯盟》等電影反攻，但係單睇今年嚟講Marvel推出咗三部電影，分別係《銀河守護隊2》、《蜘蛛俠：強勢回歸》以及《雷神奇俠3：諸神黃昏》，三套電影嘅口碑同票房都相當唔錯，特別係《雷神奇俠3：諸神黃昏》更加係一洗前兩集嘅頹勢吐氣揚眉。

個勢咁強勁，難怪當11月尾推出《復仇者聯盟3：無限之戰》預告片時全城轟動，單單喺Marvel官方facebook專頁已經有成77萬人次觀看，嚟緊2018年頭嘅《黑豹》更加令人期待。

今日Marvel再次發佈出好消息，就係一路只有少量劇照流出嘅《蟻俠》續集終於知道上映日期，不過預定2018年6月28日上映嘅《蟻俠》續集就引嚟大量網民圍插喎，點解？咪就係個譯名出事，《蟻俠2：螞蜂俠崛起》(Ant-man and the Wasp) 嘅故事係由上集嘅彩蛋片段帶出，上集前蟻俠科學家彭漢利將已經死咗嘅老婆黃蜂女嘅戰衣改良，再交咗俾囡囡可兒，成段彩蛋好明顯為《蟻俠2》鋪路，而今次網民難得地意見一致覺得「螞蜂俠」呢個名點都唔夠「黃蜂女」貼切，更有網民表示無論係中譯漫畫定係上集《蟻俠》，呢個角色都係叫大家耳熟能詳嘅「黃蜂女」。

其實譯名出事都唔係第一次，好似今年好收得嘅《雷神奇俠3：諸神黃昏》本來打算叫做《雷神奇俠3：神域末日》，後來經網民眾志成城下「革命成功」，今次Marvel會唔會順應民意，唯有拭目以待。

更多娛聞，喺晒《娛果》
http://fb.com/appledailyent