今日起，具同股不同權架構嘅新經濟公司，可以入紙向港交所（388）申請上市，不過內地A股市場醞釀推CDR（存託憑證），有搶飯食之嫌，總裁李小加就喺網誌度話，香港同內地唔係競爭，而係同學關係，但又話今次考試香港高分少少，有60至70分，暫時贏只係得55分嘅內地喎。
點解香港高分啲呢？就係因為市場開放程度高啲，冇收入嘅生物科技公司亦可以申請來港上市。咁樣講嘢阿爺會唔會嬲嬲豬㗎呢？咁小加都好識做咁講咗句，話內地市場潛力如果完全釋放，呢場考試內地就有95分。

話新經濟係藝術多過科學

咁香港到時幾多分呢？小加話內地崛起，會帶嚟巨大嘅「外溢效應」，香港都可以提升到85分，比起全班其他同學都高分，不過華華就唔多明考試期間點解可以「外溢」，老師會唔會取消考試資格㗎？
雖然小加係今次新上市制度嘅擁護者，但佢都多次重申佢都唔係完全放心，例如點樣定義「新經濟」，佢就話呢個係藝術多過科學；其次就係冇收入嘅生物科技公司，股價可以一飛沖天，亦可以一文不值，風險非常高，但之後會不停完善機制保障投資者。小加最後希望佢嘅BB「上市新規」一帆風順。

李華華

mailto:[email protected]