曼聯周六喺英超作客修咸頓，球隊領隊摩連奴喺賽前透露，上場英格蘭聯賽盃4:1擊敗伯頓嘅賽事中，後備上陣踢咗45分鐘嘅左閘勞基梳爾今場又無份，因為摩佬話佢仲未搞掂。

22歲嘅勞基梳爾自從喺2014年由修咸頓入「魔」之後，只係幫曼聯踢過48場波，摩佬話希望佢再操弗啲，先至會有得踢：「佢仲要再努力啲，就係咁簡單。你都有睇場英聯盃㗎，你同我睇嘅嘢一樣嘅。你問我鬥修咸頓佢會唔會踢？佢唔會呀，佢仲要繼續進步。勞基梳爾六個月無踢過波，我無預計佢一復出就喺場英聯盃做最佳球員，或者跑上跑落45分鐘，呢個係一個過程嚟㗎嘛，佢太耐無踢過波喇。」