張建東呢個行會新貴果然唔簡單，一出手，就將班立法會尊貴議員殺得棄甲曳兵。話說噚日財委會審金管局總裁任志剛，難得去年外滙基金回報得3.1%咁低，而任總又大加自己人工逾12%去到成千萬，真係千載難逢嘅好機會。於是卿姐、單仲偕、涂謹申等個個都搭定炮台，準備開火。
咁張建東幫政府又好，撐任總又好，作為外滙基金管治委員會代表，總之佢就做足功課有備而來。大家可能唔記得佢都做過立法會議員，所以舊地重臨全無怯場，仲周圍同人打招呼。開波之後，佢更加入晒狀態，無論你質佢乜嘢，佢都好堅定咁回覆你，而且有根有據。原本預咗一個鐘玩佢，結果45分鐘班議員就子彈都冇晒。尤其係卿姐寸佢中英夾雜之後，張建東轉台用英文，更加BB巴巴，好似揸住把大關刀咁，掃低晒對手。
其實外滙基金表現、金管局高層人工、投資策略是否太保守……都係可以辯論，可以爭議，只係一眾議員喺呢一方面做嘅功課、對議題內容嘅熟悉，都遠遠落在張建東之後，又撩唔㷫任總，於是就俾人輕易過關。
講完張建東，都要講吓任總。佢近期喜好引經據典，尤好鄧小平語錄，難得上立法會當然要表演，佢喺答問時，兩度引述鄧小平說話，似乎好配合到中國人民銀行公告內容嗰種style，但態度就有少少令人側目。

任總話卿姐挑撥離間

前後4小時，卿姐針對金管局嘅管治問題，發射咗多支「火箭」，任總卻無乜回應，又唔反駁，搞到卿姐無晒癮。佢形容金管局嘅管治安排係「怪物」，點知反而畀咗個機會任總發揮，臨完場時，任總特登話：「劉議員頭先話我哋係怪物……你話我乜都好啦，黑貓也好、白貓也好，鄧小平曾經講過，捉到老鼠就是好貓。」咁都算答議員，好冇誠意啫。
任總喺回應另一議員提問時，又再引述鄧小平講話，話「金融業好重要，可以保障經濟嘅核心……基本法109條都有寫明」；真政治正確，又有基本法、又有鄧小平，香港嘅政府官員真係要學吓嘢啦，抵人攞成千萬1年！
卿姐問唔到人工，就問上星期煲呔話銀行界顧住打波、但其實銀行界就話佢哋一直做緊嘢，究竟任總覺得煲呔咁嘅批評係咪啱呢？任總都醒目，嚟一招好言相勸，叫卿姐唔好挑撥佢同特首嘅關係，終於激㷫卿姐！


爆料熱線：29290000、27860099
報料傳真：26239278
報料電郵：[email protected]