蕭定一出品嘅電影《棟篤特工》已篤定成為賀歲檔華語片冠軍，而佢旗下嘅hmvod，亦都拍咗改編自本地網絡作家向西村上春樹嘅短篇小說《向西聞記》，成為同名劇集。

《向》劇由10個故事所組成，全套劇有13集，頭炮將會係3月8日播出，由張繼聰同胡杏兒主演嘅兩集完單元《畜牲傳心師》，喺日前發佈嘅預告入面，阿聰仲大講粗口。同劇仲有唔少藝人演出，包括王宗堯、趙永洪、白健恩同杜小喬。

據聞，近期受歡迎嘅男子組合農夫——C君同陸永，本來會分別演出兩個單元，連價錢同故仔都傾好，但唔知點解兩人最後反口唔拍。

傳聞係無綫出手叫停，因為有人想將霸權推到網絡平台，所以出手阻止農夫接網劇。

農夫同無綫雖然冇藝人合約在身，但佢哋係大台有唔少演出機會，仲有份主持萬千星輝頒獎禮，所以權衡輕重，都係聽話穩陣。

今日陸永接受電話訪問，講到反口唔接拍《向》劇，佢話有聽過：「知道有傾過啲網劇，實際係邊套都未埋牙，我諗有蕭定一間公司份。有冇應承過拍，就唔知，係我自己公司同佢哋嗰邊公司傾，真係唔清楚。」講到TVB有冇介入過網劇件事，陸永就話：「其實我唔係無綫經理人公司0架喎，所以照計佢唔會介入到。」

蕭定一就話：「我唔明獨立製作公司，拍電視劇點解TVB可以制止，我覺得係完全窒息香港娛樂圈發展嘅絆腳石。」至於無綫方面就未有回覆。

精選娛聞，喺晒《娛果》
http://fb.com/appledailyent