前日，孫柏文睇我哋壹網站，睇到條新聞短片關於兩頭由港交所（388）獨立非執董莊偉林養嘅洋狗。話莊偉林一家同佢哋兩隻金毛尋回犬行山（喺熱帶養長毛狗？仲要唔剪毛？仲要33度行山？）點知兩狗中暑，先昏迷，後升仙。
據旁述，莊偉林見狗昏迷所以報警，而政府派出飛行服務隊去拯救。唔知係咪以前做分析員嘅職業病，個腦忍唔住即刻開始計數。根據以前政府叫人唔好濫用救護車嘅propaganda，救護車每次出動，成本要幾千蚊。走地嘅都幾千，用直升機至少要兩萬蚊。
雖然冇吊走啲狗，亦冇降落，不過我又諗，如果吊個當值醫生落去，佢一睇到會唔會話：「頂！我醫人唔係醫狗！」
點都好，兩萬蚊呢個數不斷喺我個腦盤旋，之前旺角巴士撞小巴意外，其中一名傷者被送往伊利沙伯醫院急症室後，醫管局要佢屋企人畀兩萬銀先肯用某隻藥去救。唔通中國人不如洋人狗？