噚日出席活動時被問到婚期時，苟芸慧就話留番今日等男友陸漢洋回應，兩人今日拍住拖現身金鐘舉行《電子方程式錦標赛》記招，當被問到是否有重要事情宣佈時，陸漢洋話：「大會宣佈佢（苟芸慧）擔任大使，我哋兩個冇特別嘢宣佈，噚日(前日)我有睇報道，可能有少少說話上誤會。」苟姑娘亦指事後跟男友講，原來奪冠後結婚一事係之前記招時有記者提議。

對於婚事，陸漢洋指兩人對結婚一事經已肯定，而地點仍在思考中，所以未有確實日子，問到求婚未？陸漢洋話：「太私人唔講畀你聽，想留驚喜畀佢。」身邊苟姑娘表示唔心急，至於婚禮喺海外定香港舉行，陸漢洋表示尊重女友會喺加拿大舉行，香港亦有好多朋友應該都走唔甩，其他細節仲需要好長時間籌備，想有一個幸福浪漫嘅婚禮畀佢。苟姑娘聞言甜笑話：「你平時已經好浪漫。」陸漢洋聞言驚喜表示竟然獲讚，苟姑娘再讚男友放下賽車手型格，日前教佢啫嘴鍚甫士，等佢影唇膏硬照，問到係咪錫住教？苟姑娘話唔係，陸漢洋話：「情侶kiss好正常，佢不嬲都靚，所以唔使做太多表情，咁我咪教佢我平時台上攞獎表情。」

苟姑娘大讚男友教授賽車技術，還教授影硬照甫士，陸漢洋指見到女友練車越來越驚，因為圈速越來越快，就快追到正式車手圈速，最後陸漢洋希望formula e贊助花車，可以結合環保、賽車、結婚同香港原素。