周杰倫最近收一千萬港幣片酬接拍朱延平執導新戲《灌藍》，噚晚佢同蔡卓妍（阿Sa）、陳柏霖等演員喺上海出席開鏡記者會。唔知係咪緣份嘅安排，周杰倫喺上海浦東濱江大道出現，佢前女友侯佩岑噚晚同一時間喺附近嘅上海東方藝術中心主持「新娛樂慈善群星會」，原來大會都有邀請周杰倫出席，但遭到拒絕，不過到噚晚都仲有傳周杰倫會現身，同舊女友同台。
噚日下晝周杰倫喺上海拍戲時話：「我很早就知道主持人是誰，但不會因此不去。」佢話雖然分手分得唔完美，但同侯佩岑仲係朋友，會互相關心問候，周杰倫話：「是我自己沒講得很好，她是這麼好的一個人，我還是在學習如何處理感情。」

未跟大隊食飯

其實周杰倫前晚已經到咗上海，但冇同阿Sa成班演員去食飯，選擇留喺酒店，佢噚晚亮相記者會時，現場大班fans即歡呼吶喊，佢好開心咁揮揮手，話希望套戲拍得好，票房各方面成績都好喎。
至於侯佩岑噚晚除咗做主持外，仲獲得「2007最期待閃亮之星」獎，佢噚日透過經理人洪毓茹話唔知周杰倫都喺上海，只想專心做好份內工作。
另外，對於近日有內地作家出咗本《死神愛聽周杰倫》嘅書，搞到俾周杰倫經理人出律師信，又俾歌迷恐嚇，周杰倫話唔知情，仲話：「我不喜歡和死亡有關的東西，就連《死亡筆記》都沒看過，我其實不太在意肖像權，但不喜歡別人拿我的名字寫恐怖小說。」