政府再三話喎，人大常委八三一框架唔可以撼動㗎，泛民議員等住政改否決方案之時，梗係準備吓民主黨何俊仁嘅辭職公投啦。花生友聽聞，何俊仁至今都未定幾時辭職、黨員大會亦未討論呢件事，但有傳媒日前竟然話喎，何俊仁初定六月一日辭職，嚇到唔少泛民中人滴汗，以為民主黨自把自為搞公投又唔預佢哋份，最後發現係虛驚一場。
空穴來風、未必無因，嗰晚有報道話何俊仁敲定六月一日辭職後，花生友都四出向泛民中人求證，但個個唔係話「冇聽過」，就係回應一句「之前唔係咁講」，甚至有人質疑：「可能我未夠層次知道呢啲機密。」

開會嘅人都答唔到

嗱，報道話民主黨嗰日係有同泛民開會傾過時間表㗎喎，點知連有開會嘅人，都答不出個所以然，最搞笑係肩負辭職重任嘅何俊仁，都話自己只係「負責交人」，其他事務就交畀各組織、團體商討，但強調冇人同佢講過六月一日辭職。
花生友四出搜刮，終於發現風聲如何傳出。話說民主黨整咗份討論文件畀嗰個會，涉及公投分工同開支；為咗方便討論，隨意寫咗個日期，點估到假亦真時真亦假？咁究竟幾時辭職先？
花生友聽聞，佢哋初步傾過，何俊仁最快四月可以辭職啟動變相公投。但至今有乜嘢變數？由於政府話安排泛民同京官見面嘛，如果中央真係嚟個急轉彎讓步，咁呢壇公投當然唔使再玩。

花生友