ViuTV為咗配合6月世界盃，本月30日開始推出遊戲節目《Goodnoght Show 全民星戰》，由梁漢文同林敏驄擔任主持，送出超過100萬獎金。原來除咗《全民星戰》之外，ViuTV又將有新搞作，就係喺7月舉行一個發掘演藝界男新星嘅真人騷《全民造星》，勝出者可以獨得100萬現金獎。

啱啱ViuTV喺官方fb上載咗一條介紹《全民造星》嘅宣傳片，片尾仲有彩蛋——影后劉嘉玲公開呼籲話：「如果你覺得自己又靚仔又唱得又跳得，咁你一定要參加ViuTV嘅《全民造星》呢個節目！」

今次ViuTV「製造」男神節目，邀請全港娛樂公司合作，已落實支持嘅包括古天樂嘅天下一集團有限公司、周焯華嘅太陽娛樂文化有限公司、蕭定一嘅中國3D數碼娛樂有限公司、大國文化、星娛樂（環宇）有限公司同環球唱片（香港）有限公司，而稍後將會有更多娛樂公司加入支持，齊齊發掘演藝界男新人。話唔定出爐影帝古天樂都會參與做評判甚至喺節目中亮相。

除咗勝出者獨贏100萬之外，仲有一樣好吸引嘅條件，就係可以借此機晉身歌影視，即係有機會唱歌、拍戲同拍電視。如果自認有演藝天份嘅男性，只要年滿18歲同有香港身份證嘅話，無論你係乜嘢國籍同膚色都可以參加。

《全民造星》由即日起至下月12日晚上12點接受各界男神報名，有意參加者可透過ViuTV官網報名，又或者喺下個月5日及13日參加ViuTV嘅公開招募活動。入咗圍嘅參賽者需經過為期3個月嘅星級導師訓練，喺節目內接受連環歌舞及各類演出考驗，出線者重有機會到美國集訓，但講到最吸引，梗係100萬現金同入行機會啦。

《蘋果》今日打俾ViuTV製作部副總裁金廣誠，問點解只選男神時，佢話：「選完男神再選女神吖嘛。」咁本身係演藝界嘅男藝人可否參加比賽？金廣誠話：「只要冇合約喺身，以及自問聲色藝俱備就可以。」