劉心悠，馬國明、康華、羅霖等，今日喺尖沙嘴出席慈善義賣活動，心悠因為喺劇集《深宮計》入面嘅廣東話發音唔正，有網民惡搞佢嘅發音不準翻譯圖，原來心悠自己都有睇到啲惡搞圖，冇嬲仲大讚有創意：「啱啱有人笑我點解古裝劇講英文，佢嗰字幕對得好搞笑，好有創意。」

有人提議心悠搵個港男做男朋友，日對夜對，順便可以惡補廣東話，心悠爆笑話：「呢個雖然係好好嘅辦法，但我覺得最直接都係去上課學。」而自認保守嘅佢又講到入行十年，終於都拍露背戲，下一步會唔會係着比堅尼出鏡呢？佢笑話要咁再等多十年，平時去游水都係着運動款式。

另外，馬明同女友黃心穎喺劇中奉旨拍拖，問佢有冇感受到心穎藉對白示愛，馬明竟然玩踢爆：「現實中，佢完全無咁做過。」不過佢就承認因為呢個劇而戲假情中，將「了解緊」嘅關係昇華到更高層次，佢話：「如果每日都係睇戲食飯，其實唔會有好多時間去互相了解，但一齊拍戲個幾月，就有個階段去了解。」

精選娛聞，喺晒《娛果》
http://fb.com/appledailyent