旅遊R本來滿肚密圈，去年已經籌備搞英國歐洲遊樂團，所有細節都諗通晒，今年二月開始郁手搞宣傳，點知萬事俱備之際，沙士突然殺到，惟有緊急叫停，再諗辦法，今年暑假嘅出外遊學團活動，已經無復舊觀矣。
旅遊R去年派愛女參加遊學團，實地體驗，愛女中途病倒，因係小學生，用英文與英國醫生溝通有困難，旅遊R最後諗到越洋打電話畀「運通黑金卡」服務處，搵到一個喺英國嘅香港人醫生去睇佢個女，旅遊R話：「黑金卡又幾有辦法噃！」

呢日食飯時碰到博士Y，講起呢件事，博士Y話：「旅遊R唔算奄尖，大班嘅要求重刁鑽，佢自己出外旅遊鍾意揸積架，去巴黎前，要求黑金卡同佢搵一架積架，內裏嘅軚盤、波棍都適合大班平時習慣嘅，等大班一去到酒店check-in之後，就可以揸車去街。結果黑金卡一樣交到貨。」
以前有金卡已經算巴閉，現在人人都揸住白金卡，於是信用卡公司更上一層樓，推出黑金卡，務求有錢佬覺得自己特別威威，與凡人唔一樣，最唔一樣嘅就係提供二十四小時環球貼身服務，可以幫卡主喺巴黎租車、紐約百老滙買戲飛、西班牙book定哥爾夫球場等等。左丁山自問係凡人，無謂攞張咁高檔嘅信用卡，以免攞完唔用，盞冇面子。（讀者黃先生來函云：世衞希曼醫生以德語發音應譯作海曼，希曼是大錯！）