喺旺角佔領區，盡顯MKStyle，可以話係龍蛇混集，亦可以話係世界大同，更有宗教自由，由於10月3號疑似黑社會人士落旺角搗亂，拆帳篷出刀都冇事，香港警察卻放軟手腳，市民竟要自發捉暴徒，網上更多條片顯示出警察甚至幫搞事人call埋的士送上車，引起民憤。

「旺角黑夜」激發「民間智慧」，有市民自發買咗關帝牌放於旺角道交界位置，由於供奉關帝一直被指乃是黑白兩道所遵守的共同民間習俗，市民相信對警察及黑社會皆有震攝作用，故連日來唔同市民都為旺角道的「關帝廟」修葺，更有「廟祝」、「蒲團」等一應俱存，並且香火鼎盛。另一邊亦放置了耶穌像，設備雖簡陋但同樣一應俱存，更有牧師在旺角施餐。

早前就有網民將旺角港鐵站A出口的牌改圖惡搞，顯示出有「關帝廟」呢個景點，但今日GoogleMap你去搜尋「旺角關帝廟」，真係會搵到「關帝廟」所在!難道呢啲就係高官們所講嘅「外國勢力」?

更諷刺是，噚晚旺角反黑組企圖圍住旺角「關帝廟」想清場，拋出的理由是「懷疑進行黑社會儀式」，網民就紛紛話:「終於肯認啦咩?」「你哋都拜關帝o架喎。」不過今日有市民為警撐遮都被指係「挑釁行為」，香港光怪陸離，市民這兩星期似乎仍未習慣。