韓國時裝雜誌成日都會搵唔同年齡嘅女星做封面，近日45歲韓劇《Signal》女星金惠秀同埋女團f(x)嘅前成員Sulli都先後為雜誌影咗封面。

當中45歲嘅金惠秀剛剛先喺本月3號舉行嘅「百想藝術大賞」中，打低《太陽的後裔》嘅宋慧喬贏得百想視后，佢近日登上封面就展示佢成熟嘅女人味，贏得唔少粉絲激讚。

至於22歲嘅Sulli，佢近年唔算活躍演藝圈，只係早前有份參與金秀賢嘅新片《Real》，但佢就成日幫雜誌影相。而佢早前就為《Ceci》影封面照，展示佢青春本色。

另外，韓國收費電視台tvN今年成立10周年，佢哋就宣佈為了慶祝呢個盛事，就會舉行10周年紀念慶典，又會舉辦tvN頒獎典禮，雖然具體節目內容未確定，但tvN自開台以來，製作咗唔少叫好又叫座嘅劇集和節目，好似人氣劇《請回答》系列、《未生》、《Signal》、《又，吳海英》、《奶酪陷阱》等，綜藝節目方面就有《花樣》系列、《一日三餐》等。