噚日唔知發生咩嘢事，連續幾隻中資股所公布的業績都好過預期，例如國美電器（493）中期盈利勁升45％至3.45億元，比起永樂（503）中期盈利倒退9成，成為好大對比。
雖然國美業績正斗，但經紀黃話仍然對隻股走勢唔樂觀，原因係國美正在收購永樂，家陣自己一間，業績就認真勁，但併購間唔多掂嘅永樂，將來會如何，真係好難估！
國美昨日跌1.82％，收5.95元，成交股數691萬股，金額4153萬元。永樂亦跌0.53％，收1.86元，成交股數3045萬股，金額5710.53萬元。
另外，昨日臨收市被多間大行沽到冇晒買盤的中保國際（966），中期業績由虧轉盈，盈利高達3.283億元，實在係叫人刮目相看，業績同股價表現背馳，原因係中保股價近日已偷步炒高，班芬佬趁好消息出貨。
中保昨日下跌4.8％，收5.68元，成交金額2558萬元。
慕容小初