「今晚阿Sir請食飯！」四川地震國難當前，加上早排消防協會筵開20席慰勞由香港飛去四川救災嘅消防英雄，都俾人話太鋪張，喺咁嘅氣氛之下，紀律部隊啲阿Sir近排有乜飯局，都要格外小心。前晚警隊運輸課搞咗個聯歡會，喺彌敦道聯邦酒樓筵開30席，都因應當前局勢，加插咗一個賑災籌款環節，認真識得走位。不過都有夥計認為呢餐飯食咗會「背脊骨落」，爆大鑊話有上司逼下屬參加。

每人夾錢300蚊

有人向八方報料，話呢個飯局目的係要請運輸課嘅大Sir食一餐，上頭為咗要搞得好好睇睇，迫令每個環頭沙展要包一圍枱，咁沙展惟有迫令下屬出席，位位盛惠300蚊。有夥計唔滿意被迫食飯，亦都覺得呢個時候大吃大喝唔係咁好，就爆料話上頭因應消防慰勞宴風波，臨時決定會扣起50蚊宴會錢出嚟賑災。
八方前晚去酒樓，的確見到酒樓三樓全層都俾警察運輸課包起，席間仲不斷播放四川地震災情片段，同埋勁播由Beyond《海闊天空》改編嘅賑災歌《承諾》。運輸課阿頭左禮宜（RobinJolly）都有出席，呢位識講廣東話老外嘅囡囡，咪係02年港姐亞軍左慧琪囉，估唔到佢都幾關心四川災民。

歡送督察兼賑災

警察公共關係科同八方講，呢個聯歡晚宴係為咗歡送一名督察，絕對唔係為左Sir而設。當日主辦單位跟足程序向警方申請，大家都係公餘時間參加，晚宴費用就AA制平均分擔，亦有部份警員自願捐款賑災。警方話冇收到投訴指有人被迫捐款或者被迫參加晚宴。
警察員佐級協會主席鍾錦華都有聽聞過呢個飯局，聽講係班夥計為咗慶祝近排幾個大型行動搞得好成功，同埋想為四川地震出一分力，所以先搞呢次晚宴。佢話所有警務人員都係自願參與，今時今日，警隊仲邊有人敢迫同事去呢類飯局。至於點解會有人投訴，佢就話可能係有啲同事個心唔係咁想去，但俾人叫到時把口就答應咗，內心唔係咁高興咁話。

mailto:[email protected]