今日係教院20周年大日子，佢哋出咗本特刊《教院人˙師範生》，專訪20名校友、教職員等，講述自己喺師範嘅歲月，書中名人校友有人稱藍爺嘅民政事務局前局長藍鴻震、填詞人鄭國江、bauhaus老闆黃銳林，佢哋噚日出席教院新書發佈會時，齊齊憶那些年教學往事。
其中藍爺1959到1961年讀羅富國教育學院，1961至1965年喺福華街實用中學教書，佢話「帶領40名充滿活力，甚至有點過度活躍的學生，令我日趨成熟」，佢最巴閉之處係教出兩個「鄭大班」：名嘴鄭經翰同匯豐銀行前亞太區主席鄭海泉。八方雖然想問多兩句，但藍爺好謙虛咁話，幾廿年前嘅事邊記得喎：「人哋叻，唔關我事㗎！」60年代港府實行精英教育，實用中學專收「籮底橙」，不過佢叫大家唔好睇少啲「牙擦仔」，話佢哋好有突出嘅才能㗎。

同場亦有校友講古仔，包括1965年葛量洪畢業嘅鄭國江、1981年柏立基教育學院畢業嘅黃銳林。邊教書邊創業嘅黃銳林話，最深刻嘅一課係1990年教一年級佛教堂，正好係六四事件後，佢同30個小一學生講佛教故事時，將自己對六四嘅感受融入故事，想小朋友反思同尊重生命，好記得當日學生都好專心聽。今年57歲嘅佢想退休後再教書，佢話六四一日未平反，都會再同小朋友講有關六四嘅故事，將平反精神薪火相傳。

mailto:[email protected]