「喂，生咗鏽嘅鐵輪法王，我喺呢度呀！」係古天樂把聲。

古天樂飾演楊過
李若彤飾小龍女
謝君豪飾郭靖
黃杏秀飾黃蓉
石修飾黃藥師
泰迪羅賓飾洪七公
廖啟智飾一燈大師

……嘩，呢個卡士，真實存在。
But，陳百祥飾歐陽鋒就……

仲有陶傑導讀。

其實今次呢個新版《神鵰俠侶》，唔係電影版，亦非合拍劇，而係有聲書。

呢度有得聽：　 http://bit.ly/2kPapyW

《好聲》並非香港第一本有聲書，但它是香港第一本「好聲」的有聲書。今次發起RE-U 1995年版本《神鵰俠侶》組合——古天樂李若彤再獻聲，係由《好聲》發起。之前《好聲》已推出過有聲書，亦出過好聲金庸系列，首推《射鵰英雄傳》，及後推出一套共五卷《神鵰俠侶》，已公開發售，並將於明年1月6號至7號「灣仔書展—閱讀在銅鑼灣」發售。

發起錄《神鵰俠侶》好聲書嘅著名製作人蕭潮順接受《蘋果》電話訪問時話：「今次主打係古天樂同李若彤聲演楊過同小龍女，因為當日古天樂話，如果搵到李若彤做小龍女，咁佢就幫我哋錄喇。咁我哋真係搵到李若彤，咁古仔亦都好守信用，幫我哋錄。大家都知道有聲書係保存香港嘅口述歷史，同埋我哋係一個社企，非牟利機構，唔係賺錢，而係想送俾啲公公婆婆同失明人士，所以佢哋都係象徵式收番封利是，佢哋真係純粹發自善心去做一件善事。今次亦係『灣仔書展』第一次邀請社企合作，非常之榮幸。」

《神鵰俠侶》好聲書今年年初錄音，咁錄音嗰陣有冇發生過乜嘢趣事？蕭潮順話：「當日佢哋錄嘅時候我喺office，古仔真係冇乜蝦碌，佢真係好專業。商台監製馮志豐都好專業，所以都冇乜蝦碌。」至於說書人陶傑就係分開錄嘅。