現年51歲的蘇永康前年做爸爸，兒子Jazz剛滿兩歲，他在囝囝身上學懂很多人生道理，明白簡單就是快樂，更要愛得及時。談到亡父，蘇永康坦言留遺憾，兩父子唯一的擁抱也是最後的擁抱，但始終講不出一句：「爸爸，我其實好愛你！」
撰文：余燕儀
攝影：林賓尼

蘇永康憶起亡父難免有點傷感：「爸爸嗰時肝癌，惡化到一個程度，係食完嘢要掃風，有一晚由我嚟做，我同爸爸嗰個擁抱，係自我懂性以來，唯一一次亦係最後一次，盡在不言中，深深感受到血脈相連。爸爸走咗後，我有段時間責備自己，點解唔講出口『爸爸，我其實好愛你』，但當我再大啲，經歷幾年驚濤駭浪之後，就會明白生活裏唔會冇遺憾。」因為不想人生再有遺憾，蘇永康於14年跟第二任太太馮翠珊再婚後，選擇停工1年，太太於前年為他誕下兒子Jazz。

湊仔踏實

蘇永康是二十四孝老竇，加上差不多半百得子，所以見到兒子因陌生人受驚，都會令他大為緊張，而且自從兒子出生後，在他身上學懂很多事物：「喺佢身上睇到簡單會好快樂，其實呢樣嘢已經忘記咗，好直接，你付出幾多愛，就有幾多回報。」他說兒子不停訓練自己的耐性，令他學做好爸爸：「有次太太仲喺意大利，我公幹返嚟，咁啱囝囝喺流感邊緣，38度、又屙，醫生話冇39度唔好帶嚟，嗰兩日我喺屋企對住佢，好踏實地做一個父親要做嘅嘢，每隔兩小時探熱，留意糞便有冇事，嗰吓我形容係痛並快樂着，因為小朋友唔精神，個心係唔舒服，但係快樂着，係佢全日都一嚿棉花咁黐住你，咁耐以嚟未試過。」

注重養生

相隔7年沒開個唱的蘇永康，今年6月再踏紅館，演唱會取名「ALL THAT JAZZ（AND POP）LIVE」，新歌名命為《ALL THAT JAZZ》，擺明講父子情，Jazz就是他未來人生的重點。他認為音樂路仍然很漫長，所以養生很重要：「你睇幾多前輩，60歲仲好有活力，我仲有大把時間，現代人養生係為咗將來，你都唔想年紀大會有好多狀況，飲食、生活節奏一定要節制。」
髮型：Moe of Fifth salon
化妝：Maggie Lee
場地提供：Dada Bar（The Luxe Manor Hotel）