現年52歲嘅吳國敬同美甲店老闆娘Elaine拍拖11年，阿敬求婚兩次都唔成功，佢話適當時間會再「突擊」求婚，兩人日前帶着7歲愛犬金金到西貢拍拖。
阿敬話拍拖第三年首度求婚：「嗰晚同朋友飲酒，我興之所至求婚，點知佢拒絕，第一次求婚被拒，好sad。」身邊Elaine答：「No咪no囉，都唔知點解，佢第二次求婚，又係say no。」阿敬計劃將第三次求婚：「保持神秘先，首要買定粒10卡鑽戒。」阿敬承諾當Elaine出嫁時，要將佢變成「土豪新娘」：「佢夢想婚禮係要成身龍鳳𠼦喎，佢嫁我就同親友『吹雞』，起碼都幾十對。」吳國敬希望屆時雙喜臨門。

金金做和事

兩人即使未簽婚書，已老夫老妻，Elaine話：「通街啲人都叫我吳太，結唔結冇分別，第一次畀人叫吳太，我冇應冇望，叫吳太老得滯，嗌敬嫂會多啲。」阿敬得戚：「佢走唔甩，我落咗藥，落咗降頭呀。」Elaine好奇問阿敬係咪有11年之癢？阿敬搞笑：「生癬咩。」兩人平時除愛得癡纏，也會開片，十足十韓片《我的野蠻女友》真人版，不過最後阿敬𠱁番女友，懂性金金甚至乎幫拖做「和事狗」，用身體隔開兩人調停。
撰文：馮仁昭
化妝：Chris Lam