這次（13日）快活谷夜馬，用B跑道角逐，出馬仍疏落，只有兩場滿額，相信近期都會持續這情況，出馬少形勢較單純，對馬迷而言可能是好事，較容易選中，況且對投注額也沒有影響。

講番騎師及馬房形勢，賀、文、徐及葉廐之參戰馬實力甚強，可優先留意。大細潘都手執重兵，有權連場報捷。

第三場五班1650米：徐雨石出兩駒，「埼豐」是第一選擇，睇操練部署，應是主力所在。上季曾在谷草及泥地一哩得季軍，所負不遠。

由於未贏過，故暑期被調降至最低班，復課好有計劃地做工夫，狀態循序漸進，8月尾試大閘，沿欄帶放，直路按實，才被推騎考驗之「快樂寶貝」趕過，姿態甚輕鬆。

大閘後加強打磨，兩課拍跳有不同演繹，跟「皇龍大將」一課入直路讓出內檔給廄侶竄上，拍住衝刺不分勝負，表現相當好，埋門拍「勁嘉輝」，則刻意被對手拋離兩、三身位跳輸，有示人以弱之嫌。

論馬已準備就緒，本身跑法機動，今場快馬唔多，有廐侶造步速，本身能切入跟守好位，末段再加速走甩。

「滿貫中環」上季同程一再跑近已試準，韁口敏感之馬，用潘頓會有更佳發揮。「隨時候命」拍跳大步肯走，落班用強配，有心打硬仗。

「荷蘭風車」埋門大閘追得好，同程能交兩W，跟杜利萊特別合拍，當然不容輕視。

其餘「甜統」僅維持上仗水準。「戈寶」試閘末段力弱，進度徘徊。「魔幻神駿」試閘跟跑，狀態在冒起中。