當年今日
關於我們
中環在線:彤叔兩爺孫鬥閃 - 李華華
蘋果日報 2012/08/24 00:00
32.72卡
祖母綠形無瑕白鑽
新世界發展(017)創辦人鄭裕彤同鄭志剛兩爺孫今日好忙,同一個下午一齊爭取曝光,阿爺大晒總值30億嘅私人巨鑽珍藏,阿孫就同NBA球星林書豪主持分享會,相信兩邊都會「閃爆」!
周大福(1929)今日喺灣仔君悅酒店搞咗個「稀世珍寶私人預覽會」,展示彤叔多年嘅私人珍藏,其中一批高級稀有彩鑽總值20億,重頭戲係一粒重102.88卡嘅圓角階梯形艷彩黃彩鑽。
喺對面海尖沙嘴K11商場,新世界聯席總經理鄭志剛就會同林書豪主持一個分享會,書豪屆時會同一班學生哥分享個人經歷。鄭志剛亦會把握機會同林書豪傾「飛躍新世界」慈善計劃嘅合作細節。
新世界計劃贊助150名8至11歲嘅小朋友學打籃球,鄭志剛之前透露,希望同書豪傾,畀打波叻嘅小朋友第時跟書豪學一招半式,林書豪唔會sayno啩!