韓國女神全智賢今日大年初三報喜，宣佈升格做媽咪，粉絲都超級興奮，開心B仔趕得切出來利是，令今個新年更加歡樂。其實韓國演藝界排隊等生猴B嘅，仲有韓劇《懷抱太陽的月亮》女星韓佳人同《假面》演員老公延正勛，同埋女團WonderGirls（WG）前隊長先藝。

今年5月就結婚11年嘅韓佳人同延正勛一直恩愛，前年驚爆第一胎流產，令滿心歡喜等做爸媽嘅二人大受打擊。好彩皇天不負有心人，去年11月底佢哋再次報喜，宣佈已懷孕19周。為安全起見，韓佳人停工專心安胎，數數手指，佢已經陀B逾7個月，粉絲都好期待佢哋嘅BB早日出世。

至於早已育有一女嘅WG前隊長先藝，上年9月亦有好消息，被踢爆相隔兩年為傳教士老公James懷有第二胎，當時佢已經懷孕8個星期，粉絲都希望佢可以追仔成功，湊成一個「好」字。