唐唐前日先響港台畀烽煙聽眾寸佢生活喺雲端，不知民間疾苦。噚日佢響英文台又開口夾着脷，本來想講政府遲啲會向家居徵收排污費（sewagecharges），點知講成係水費（watercharges）。
噚日打去英文台嘅聽眾多數都係關心高地價政策，同埋環保問題，明顯冇前日中文台嘅聽眾咁大怨氣。唐唐可能因為咁樣鬆懈咗，講完預算案主要係回饋中產後，就話未來10年平均每個家庭每年要畀多四百幾蚊「水費」，同政府分擔吓淨化海港嘅營運成本。說話出街兩粒鐘唔夠，新聞處已經撲出嚟更正，話唐唐口中嘅「水費」其實係指「排污費」，司長再一次瘀爆。唐唐真係唔識得分水費同排污費，定係又特登搞爛gag？究竟佢有冇自己交過水費？