自掏腰包之餘,元秋仲應記者要求,特登走入會議廳邀請馬逢國一齊食雞,可惜當時馬逢國唔喺度,佢就轉而「捕獲」路過嘅經民聯林健鋒一齊開餐。林健鋒好搞笑咁提醒元秋,小心被罰15萬呀,元秋話唔怕,點解?「我食得好靚㗎!」繼而指「雞係好食過Pizza」,隨即現場表演食雞,教路話首先要攞起嚿雞,跟住望下,再放入口,食完「嗯」咗幾聲,佢就大叫「好好味喎」,代言效果隨時勁過無綫嗰班藝員喎!
唔少傳媒路經走廊,見到炸雞堆積如山,都忍唔住問:「無綫請㗎?」民主黨涂謹申行過時亦忍唔住抽水問:「使唔使叫《東張西望》嚟影?」而其實呢,馬逢國之後一度路過立法會走廊,被問到記者喺走廊食雞有冇問題時?佢話「冇問題啊」後就快閃。
李八方
mailto:
[email protected]