韓國男團EXO三名中國籍前成員Kris、鹿晗及Tao，先後於前年5月、10月及去年4月向SM事務所提出解約，而雙方多次派出代表律師上庭答辯後，仍然未就解約一事達成共識。

今日SM再發聲明，指摘三人擅自離開公司及組合，又於合約未約滿前私自展開商業活動，係違法行為，因此再次向內地法院，向三人及通過三人嘅不法演藝活動嚟賺取利益嘅相關企業提出共14起訴訟。

SM表示：「三人於有判決結果前，仍屬SM藝人，佢哋進行嘅全部活動都係非法嘅，我哋將持續喺內地方面採取一系列法律措施。」而SM向內地法院提出嘅14起訴訟，已於上周五正式立案。
　
而仍留喺EXO嘅中國成員Lay，於倫敦時間26日晚，喺第四屆中英電影節中憑電影《前任2:備胎反擊戰》奪得最佳男配角獎。