【一定會報案】聞麥明詩性侵舊事 香香:我第一個反應會摑佢一巴
岑麗香薛家燕香香石耀庭
岑麗香、薛家燕與囝囝石耀庭及未婚妻Zoe,今日喺紅磡出席「新婚生活易大賞2017」活動,香香話會分享結婚時嘅籌備情況同難忘事,佢就話多得老公為婚禮所有事作最好嘅安排,仲畀老公100分,香香話:「佢計劃嘢叻好多,佢仲好識講價。」香香仲自爆婚宴嗰日攰到冇洞房。
問到麥明詩噚日爆出曾被性侵(新聞連結: http://bit.ly/2AL0zrK ),問香香有冇試過被人抽水?香香話:「我自己比較小心,都驚如果嗰個係我真係想像唔到,我未試過,我唔想推介暴力,但係我第一個反應應該係會摑佢一巴,會大嗌、一定會報案,我唔知成件事,唔方便講太多。」
至於家燕姐就話擇咗日,明年6月11號就會娶新抱,家燕姐話:「喺洲際擺,最多55圍,呢幾日都開始寫名單,同個仔商量過,佢哋後生另外再搞一日,我朋友親戚多,唔同輩份都有,希望大家唔好介意。」講到必須要邀請嘅賓客,家燕姐話:「七公主、修哥、曾江同一班同事,都好頭痛。」家燕姐笑話四哥謝賢都一定會請,因為對方睇住個仔大,問家燕姐會唔會安排四哥同曾江同枱?(佢哋05年曾經喺活動上鬧不和,四哥仲當面摑咗曾江一巴,新聞連結: http://bit.ly/2A27ZaQ ),家燕姐笑話:「想趁呢個機會一齊,四哥會畀面我嘅。」而問到前夫石保慶會唔會出席?家燕姐就話:「佢有同個仔講,會另外再同佢食飯,佢知道唔方便出現,都好嘅,唔係就會變成主角。」
更多娛聞,喺晒《娛果》
http://fb.com/appledailyent