中資地產股升勢欲罷不能，幾隻龍頭股近兩日累積十幾個巴仙升幅，趁住有勢，唔少人都吼實一啲落後同類股，麗豐控股（1125）係其中一隻。隻股噚日收0.325元，係咁意升兩格。現價博唔博得過？短炒可以諗諗。
喺「Yahoo討論區」入面，網友「心大心細」話自己0.34元上咗車，正在擔心會俾人質穿0.30元。不過，佢對隻股尚存一絲希望：「佢以往都係喺公布業績前後升得好勁，可以兩三日就升1毫，唔知11月公布業績，會唔會升到$0.4？睇番上年11月，佢又喺公布業績時勁升。」
滿手都係嘅vwmho就話冇眼睇，佢由0.48元開始入貨，之後喺0.445元、0.36元同0.34不斷溝淡，點知愈溝愈衰。

麗豐係「麗新集團」喺內地嘅物業發展同投資旗艦，物業權益主要位於上海同廣州。旗下擁有唔少優質物業，包括上海嘅香港廣場、凱欣豪園，同埋廣州嘅東風廣場、五月花商業廣場等。講麗豐，唔可以唔講NAV，根據中期業績，隻股NAV大約73仙，即現價係四五折大平賣。再講，上述NAV係舊數，之後物業漲價仲未反映，所以實際NAV應該唔止呢個數。
麗豐今年初引入新加坡嘉德置地（新加坡政府旗下「淡馬錫私人有限公司」為控權股東）為第二大股東，入股成本每股0.40元，現價低過猛料股東嘅家鄉價好多。
今年初中資地產股熱炒時，隻股最高升至0.53元，點知一個宏調搞到股價碌到最低0.28元至止跌。近月喺0.3元企穩，噚日以陽燭升穿保歷加通道中軸，MACD現熊牛訊號，9RSI率先突破降軌阻力，配合成交增加，短炒一轉應該冇問題，博佢升穿0.36元後挑戰0.40元，質穿0.30元要止蝕。
余文