2017年對於有線（1097）嘅一班員工嚟講可以話係迷迷惘嘅一年，年頭公司前景生死未卜，人心惶惶，唔少人選擇走為上著，公司暫停填補人手。其後獲新世界（017）主席鄭家純以及遠展（035）主席邱達昌嘅永升於9月中正式入主，但至今都成3個月，似乎都仲未完成交接，之前自然流失咗嘅都仲未補返。

下個月中就係農曆新年，但內部傳出以往係12月底完成的薪酬檢討要推遲到3月底，到時先知有冇人工加，而最重要係嚿年1月底出嘅花紅雙糧今年都唔知趕唔趕得切過年前出。我地就問過有線，佢地就話，「管理層現正就集團的營運狀況及來年財政年度的業務展望作深入檢討，並將於三月份完成及公佈整體薪酬檢討方案。」

查實今年先係純官同老虎仔入主後第一個新年，希望一班有線員工有個好開始，唔使再擔驚受怕，過唔到年啦。