ViuTV上年製作嘅貼地愛情小品劇《瑪嘉烈與大衛系列─綠豆》，由林保怡、周家怡、潘燦良同廖碧兒主演，劇集播出後，口碑同反應都唔錯。下個月同一系列嘅《前度》將會首播。除咗之前公佈有份演出嘅文青女神袁澧林，同許志安會有場濕吻戲外，噚日《前度》嘅預告片亦正式出街。

喺《前度》預告片中，有份拍電影《點五步》嘅黃定謙，同喺浸會大學傳理系畢業嘅女角陳凱詠(Jace)，飾演一對舊情侶。Jace喺前度工作嘅髮型屋，目睹前度同女同事嬉哈吵鬧，一直鼓埋泡腮強忍淚水，終於等到前男友招呼自己，但眼淚已忍唔住大滴大滴咁流出嚟。

雖然預告片只有約兩分鐘，但有網民就話兩個主角都做得唔錯又夠fresh，期待下個月套劇嘅播出。