日前莊端兒開記招爆同（前）經理人諸葛紫岐擘面解約，理由係「喺我哋呢段合作關係裏面，有人想我做一啲超越咗我底線嘅事。」有指有人想莊端兒接拍由王宗堯執導嘅《作家的謊言》，戲入面有做愛同口交場面，莊端兒認為電影內容尺度超越咗宗教同底線而拒拍。

今晚當時人王宗堯就聯同王灝兒（JW）喺中環出席手機活動，問到王宗堯有冇follow件事，佢話：「有嘅，周末解決咗，冇乜補充，我諗係誤會嚟，佢哋自己公司糾紛，交返畀佢哋自己。」當知道莊端兒入院割膽，王宗堯就祝佢早日康復！問到莊端兒建議搵諸葛紫岐拍呢部戲，王宗堯聽到就即刻話：「唔敢！我驚行唔到入Neway門口。相信大家嘅立場唔同，經理人想藝人接多啲工作，藝人有自己個性。呢行冇敵人嘅，希望佢哋好啦，個圈始終好細。」

而JW就話自己都有低線，就係唔可以着比堅尼行騷唱歌，問到好友何超蓮同方力申傳緋聞，JW就撐大家只係好友，提到超蓮練出馬甲線，JW就爆超蓮引誘佢偷食薯條，佢話：「o依家做完演唱會，可以係咁食。」