兆尊御紅顏有術，一個星期七日，分俾三個女朋友，仍然令女友們死心塌地，不時同女友出街被俾影到，兆尊早兩個月喺《蘋果》專訪，就講過：「以前阿爸教我，食開眉粥好過愁眉飯，如果要愁眉飯嘅話，不如唔好食。」（新聞連結： http://bit.ly/2oLLYXn ）

不過祥嫂洪金梅唔係咁睇，喺魯芬設靈當日，指阿仔兆尊係為咗復出，先一拖二拖三咁出嚟。（新聞連結： http://bit.ly/2kYsw8E ）

呢位阿媽知仔心肝，真係俾佢講中，兆尊復工了。

鄧兆尊、梁烈唯、曾淑雅（Jumbo）、蔡淇俊等等，今日喺大角嘴為電影《失業皇帝2017》進行開鏡儀式，今次係鄧兆尊相隔8年再次投入拍攝，一嚟就要演落難角色瞓劏房，佢話心情唔會特別緊張，不過覺得幾攰。至於酬勞方面，兆尊話：「冇同劇組拗過，點知自己咩價，今次主要想試下o依家拍嘢方式同以前分別，覺得o依家節奏快好多。」

兆尊連日開工，三位女友會唔會詐型？兆尊笑言：「唔忙，你點知我開工冇女朋友，其實冇所謂，唔會詐型，呢個係我唯一生機，畀條生路自己行下，我都係同阿叻一樣，俾人推出嚟搵錢。」

貴為富二代有樓、有地、有女，理應生活無憂，兆尊竟然話：「食泥唔會飽，磚頭都咬唔到落口，呢啲虛浮嘢。」早前有消息指兆尊出售幾億地皮，兆尊話：「我唔知呀，不過成事之後就會話我知，除非細佬夾帶私逃。」

早前祥嫂放低家事，話要將永祥苑改建成伶王紀念館，仲話會搵埋仔女幫手（新聞連結： http://bit.ly/2nNiKEu ），祥嫂當日對聯絡仔女呢個問題未有回應，到今日問兆尊祥嫂有冇搵過佢，兆尊話：「祥嫂德高望重，唔好打搞佢，等佢想打俾我時先打，我個個電話都會聽。」

兆尊仲話紀念祥哥活動，祥嫂已經搞咗好耐，喺順德已有一個紀念館，不過所有關於祥哥珍藏都喺祥嫂手，總之有咩會配合。記者追問係咪真係會撐場？兆尊又妙答：「踩場定撐場呀？踩場就唔好喇，會有好多後遺症。」