港台人氣節目《瘋Show快活人》前DJ梁繼璋和太太莊嬿藍（Athena）99年共諧連理，組織小家庭，Athena先後替他生下現年5歲多囝囝梁雲翀和2歲囡囡梁繕喬（Cindy），這對「好」字令梁繼璋最感自豪。
梁繼璋和Athena的年紀雖相差20載，但夫妻間十分恩愛，更不時帶同一對活潑可愛的子女進行親子活動，日前，一家四口就齊齊參加playgroup。翀翀和Cindy換上日本裝扮壽司店侍應，落力炮製壽司款待爸爸媽媽，雖然全部睇得唔食得，但依然𠱁得雙親笑不攏嘴。

自02年誕下翀翀後，梁繼璋便開始返一生一世的「爹哋」新工，問到他這份做了5年多的工作有甚麼心得，梁繼璋說：「心得係從錯誤中學習，邊有人一做爹哋就識吖，我都係邊做邊學，做到老學到老。我會好留意囝囝囡囡成長中嘅生理同心理發展，佢哋唔止個樣會變，性格行為都唔停咁變，向好向壞發展，做父母嘅真係要好好薰陶佢哋。遇到囝囝囡囡曳，我會以柔制剛。」思想成熟的梁繼璋主張以身作則，他說：「父母絕對係子女嘅榜樣，所以我同太太好少喺子女面前發脾氣同亂講粗話，怕佢哋耳濡目染。」
問到兩夫婦之間會否分飾忠奸角色教育子女，梁繼璋太太Athena說：「基本上冇去特別界定分邊個做好人，邊個做惡人，表面睇起嚟，我會嚴格啲，爸爸主攻同佢哋玩，close啲，不過一到囝囝囡囡發癲嘅時候，最終極係會由爸爸做『終極大王』出手制止。」

至於平時子女間爭拗，處理家事法庭的任務就由Athena做裁判官，她說：「我會根據件事對定錯去處理，如果妹妹橫蠻無理，我都會罰佢，有時都會輕微拍吓手仔，等佢記得，但我哋好反對體罰，唔想灌輸暴力解決事件嘅觀念畀小朋友。」
梁繼璋抗拒用長線投資來形容栽培子女，他說：「話係投資嘅話，萬一將來冇回報，我怕會唔開心，所以我只當係長線計劃，從dayone帶咗佢哋嘅生命出嚟，我就預咗有責任照顧好佢哋。」
現年51歲的梁繼璋，與囝囝年齡相差46載，彼此會有代溝嗎？他說：「我心境保持好年輕，我亦唔會咁諗，我冇諗將來體力及唔及得上一個年輕爸爸，但我會盡量做得到，我都會維持健康又正常嘅生活，咁樣自己都長命啲，可以照顧子女耐啲。」
剛過去的父親節，梁繼璋與翀翀談到死亡問題，他說：「我同翀翀講，佢將來都會做人爸爸，但到時我可能都消失唔喺度，翀翀立即話：『咁到時邊個照顧我，屋企咁亂，邊個執屋。』佢講嘅時候又眼紅紅，我都唔敢再講落去。」
梁繼璋最着緊子女的是價值觀和是非觀，他說：「我要求佢哋是非觀念，對與錯都分得清清楚楚。我唔贊成佢哋太過物質主義，好似早排四川大地震，我同囝囝囡囡一齊睇新聞，我就乘機同佢哋講幸福唔係必然，要珍惜眼前擁有嘅一切，我最感到欣慰係翀翀聽完，好主動提出要拎錢捐輸，幫助有需要嘅人。」梁繼璋最反對小朋友着重物質主義，他說：「我嘅小朋友生活唔算富足，不過佢哋已經比好多人幸運，所以我唔容許佢哋要乜有乜。」

Athena同樣注重子女的德育，她說：「我覺得一個人讀書幾叻，但個格衰都好乞人憎，德行好，人都自然受歡迎，呢方面我對佢哋要求好嚴格。」
雖然梁繼璋曾主持港台王牌節目《瘋Show快活人》，獲聽眾支持，但論成功感，他謂仍不及自己苦心經營的幸福家庭，他說：「太太同一對子女，都畀到我人生好幸福嘅感覺，我好滿足。」

梁繼璋和太太Athena都主張子女向世界出發，增廣見聞，他們一家先後到過新加坡和北海道等地旅行，囝囝梁雲翀和囡囡梁繕喬最愛坐飛機，翀翀一臉認真說：「坐飛機除咗有飛機餐，仲有禮物包。」

到過不同國家，問翀翀對那裏最有深刻印象？他童言無忌說：「北海道，因為嗰度實在太凍，我都唔想再去嘞！」但當媽咪Athena重提滾雪球和坐滑雪兜的玩意時，立即勾起翀翀興趣，他雀躍地說：「我坐滑雪兜滑行時跌咗出嚟，好彩下面有個安全網。」
Athena建議家長最好待子女4歲後記憶力漸強，才帶他們外遊，她說：「因為佢哋呢個年紀對去過邊啲地方玩會留有印象，咁樣冇咁嘥，反而妹妹（指幼女梁繕喬）得兩歲，記憶力冇咁強，不過我同Michael（梁繼璋）都唔捨得丟低佢畀工人湊。」

曾任職DJ的梁繼璋認為口才是個人的表達能力，只要培訓出完善組織思維，自然口齒伶俐，自信心相應增加。梁繼璋認為訓練口才可以由小朋友開始，所以他早前創立了「梁繼璋工作室」，透過遊戲和活動，開班訓練成人和小孩的口才。

問到小朋友何時才適合參加口才培訓班？他說：「𠵱家啲家長好心急，趁子女細個就安排好多嘢學，口才唔係要學讀稿，我要求小朋友要有一定認知能力，最啱係由四歲開始，太細個冇耐性。」
梁繼璋表示授課時透過活動啓發小朋友思維，他說：「我着重誘發小朋友嘅創作力、組織力同想像力，其實家長平時都可以透過日常生活，多啲畀小朋友接觸外面嘅世界，多啲鼓勵佢哋嘅觀察能力，只要敲開佢哋思維呢度門，佢哋話題會多咗，口才就會逐步改善。」梁繼璋的長子梁雲翀在父親悉心施教下，對記者的提問反應極快，且對答如流。

新一代的小朋友能言善辯，家長也愛與子女講道理。這也是梁繼璋夫婦與一對子女的溝通方法，在長子梁雲翀心目中，爸爸是超級大好人，而媽媽卻有點惡，他說：「我覺得媽咪有時好惡，會發大脾氣。」其實媽咪Athena也不是無緣無故發惡，生氣也只因為子女太曳。

梁繼璋表示有一次責罵囝囝，令他記憶猶新，他說：「翀翀口快快駁嘴，佢話我哋可能唔係佢嘅父母，所以先咁惡鬧佢，不過我即時同佢解釋番，爸爸媽媽鬧佢都因為佢做錯，唔通放縱佢嘅行為，先係好爸爸好媽媽咩？翀翀聽完後就冇出聲。」
自從梁繼璋辭去港台節目後，他以家中作為寫字樓，變相與子女共處時間增多，彼此都很珍惜這些快樂時光，翀翀說：「𠵱家爸爸多咗時間陪我哋，仲可以成日一齊玩，我特別鍾意爸爸陪我哋玩。」梁繼璋聽後當然甜到漏。
問到翀翀將來可要學爸爸一樣做個名DJ，他說：「要呀，我都要日日返工『講嘢』。」翀翀不懂爸爸梁繼璋的工作名稱，但卻了解他的工作性質，所以會用「講嘢」來形容DJ工作，非常搞笑。

梁繼璋的太太莊嬿藍（Athena圖），原名莊妙晶，現年31歲，97年讀樹仁經濟系一年級時，參選《壹本便利》舉行的大專校花選舉奪得第三名，當時的梁繼璋因擔任選舉的司儀而認識她，翌年Athena參加港台DJ培訓班，與梁繼璋變得熟絡，更展開戀情，當時有傳女方家人反對他們拍拖，但兩人於99年結婚，現時育有一子一女。