蘋果批--選舉論壇:醫學界四角擂台(一) - 李兆富
醫生係操控生死嘅專業界別。喺今次《蘋果批》醫學界選舉論壇,就先同候選人討論一吓「生死攸關」嘅問題……
主持:李兆富 楊卓華
郭家麒:
最大問題係醫管局「藥物名冊」嘅做法,令一啲有效但昂貴嘅藥物不受補助,呢個係反智同不合原則嘅……我會責無旁貸幫佢哋。
梁家騮:
政府曾承諾過冇人會因為貧窮而得唔到應得治療,如果呢個係佢應得治療,但經過多番討論,醫管局都唔肯畀嘅話,我提議可以用一個司法程序去處理。
楊超發:
呢個問題唔係淨係影響弱勢社群,我有朋友係醫生患有一啲病,亦因「藥物名冊」問題,醫管局唔會畀到佢……(當選後)我一定會向當局反映,多啲撥款照顧呢班弱勢社群。
何栢良:
我好明白作為一個父親,見到自己小朋友有一啲好有效嘅藥物,因為冇錢,得唔到適當照顧,心裏會覺得好難受……如果藥物喺科學上清楚證明對病情有幫助……(政府)應該有計劃特別撥款。
楊:我係天主教徒,我反對安樂死,但安樂死嘅定義可以係主動或被動,主動意思係可能加啲藥物等病人離開,我完全反對;但如果係被動,即病人可能需要特別嘅藥物,我哋可以唔畀,但需要維生嘅我哋繼續畀,咁我就完全贊成。
何:作為醫生同基督徒,我係反對。安樂死嘅意思,係醫生主動因應病人要求,作為治療,將病人殺死,呢個係違反醫生作為醫者心治療病人最基本嘅原則。
郭:醫生(喺安樂死上)嘅角色,除咗自己意見,(亦要)反映社會嘅要求……香港喺呢個討論並未成熟,我覺得要再深思、探討呢個問題。
梁:定義還定義,中間始終會有好多灰色地帶……我哋每日都面對類似嘅問題,有時病人可能估計只剩得幾日命,佢想快少少,咁呢啲算唔算安樂死呢?基本上,有機會(生存)嘅,我個人一定反對(安樂死)。