【新增GD抵韓圖片及YG聲明】

韓國天團BIGBANG隊長G-DRAGON（GD）早前展開世界巡迴演唱會，噚晚（8日）佢喺曼谷展開第二場演唱會，點知GD喺台上演繹《少年呀》時，佢唔知道後面嘅升降台板降下，一時踏空跌咗落個窿，全場粉絲們時大嚇一跌，工作人員亦即時衝前詢問台下GD情況。

幸好不久GD由原來個升降板再上來繼續演出，但從粉絲拍到嘅片段中，見到GD好似扭親腳，見佢行路時要扶住腰，仲要慢慢行，似乎強忍痛楚。

GD完騷後立即趕到機場搭飛機返韓，由粉絲拍得嘅影片所見，GD應該傷勢唔重，見佢仍然可以與工作人員急步行入機場，不過粉絲就相當擔心GD係扮冇事。而今日清晨戴住帽及口罩嘅GD抵達韓國，其所屬嘅YG事務所亦對噚晚嘅事故發表聲明，表示GD未有受傷：「原本係GD隨住升降台下降嘅時候，不過GD太投入演出錯過咗時機，但好彩GD反應及時身體安全落地，並冇受傷。之後GD表示可以繼續演出，最後順利完成演唱會。」粉絲立即安心不少。