大台台慶劇《使徒行者2》今晚首播，成班主要演員陳豪、「三哥」苗僑偉、宣萱等喺將軍澳舉行宣傳活動。宣萱提到今次喺《使徒2》入面做女強人，同Mall姐嘅角色好似，不過宣萱就話其實兩個角色好唔同，一個係會殺人，一個唔會，佢話：「Mall姐係惡嘅，不過好唔同嘅，Mall姐好鍾意講嘢，講嘢好快，而今次嘅角色係好文靜，諗嘅嘢比較多，EQ比較高。」

講到邊個角困難啲，宣萱就話：「兩個角色我都好鍾意，Mall姐要記好多對白，仲要講得好快，而今次真係要做戲，少說話多做事，動作上要多啲。」

陳豪同三哥苗僑偉一齊受訪，佢哋兩個都話好期待呢套劇，三哥話因為今次係實景拍攝，加上係第一次同陳豪合作，所以好期待。今次三哥好多動作、揸車嘅戲都自己上陣，佢話：「本身導演唔知我識揸車，後來佢見到我揸得幾好，所以叫我揸，同埋我揸嗰啲鏡頭唔係好危。」三哥仲話見到劇中咁多大隻男，自己都有壓力，仲話自己放棄咗keep fit，自己係咁食嘢，而陳豪就淨係飲咖啡。