【師兄你點睇】「牛精」馬上次遇意外 易配猛人冇得揮（賴維銘）
蘋果日報 2019/12/11 06:00
鄭俊偉賴維銘蘇兆輝猛人輝牛精輝煌師兄你點睇
牛精輝煌（黃衫）前仗在谷草1800米後後上贏馬，前仗增程2200米遇上意外落敗，今仗換蘇兆輝攻力加強
賴：前騎師賴維銘
記：《蘋果》記者吳文輝
記：《蘋果》記者吳文輝
記: 國際賽周很多近況好的賽駒報名參賽，大戰過後感覺上戲碼稍弱，有好近績之馬少咗好多。
賴：如果同國際賽日比較當然無得比，不過馬匹報名都係視乎賽期而已，好似今晚（11日）第四場嘅四班1800米，一向編排唔多，以今季表現而這，鄭廐「牛精輝煌」值得睇好。
呢匹自購馬以往由告東尼訓練，始終來港評分偏高，未能交出頭馬，到上季由鄭俊偉接手，Michael養馬量唔多，不過練馬好有心機。
「牛精輝煌」試過唔同配件兼減夠分，今季開始有好成績，兩度上名後，前仗終於喺谷中1800取得來港後首捷。
到上場增程跑2200米，起步成隻跳起兼失蹄，焗住留到好後，直路上於馬群中衝刺欠順，賽績不能作準。
「牛精輝煌」上場耗力不多，相隔一日已復操，狀態體力無問題，今場用外號猛人輝的蘇兆輝攻力加強，當銳之馬有力重新贏馬。
記: 鄭俊偉當然要爭取成績，至於蔡約翰贏完國際賽勢頭良好，今晚可否乘勝追擊？
賴：蔡廐戰馬中，我特別留意較質新之「特駒聯盟」。此駒初出跑沙田1200，跑第三輸畀「發財寶」及「合衷並濟」，締出時間亦快，水準甚高。
之後綁脷轉跑1400米，效果唔理想。其實此駒由過往試閘以至出賽都快閘，轉嚟跑快活谷短途應該適合，今場除脷帶兼排檔好，用番離港在即之李寶利，有條件做番齣好戲。