【零食控留意】Calbee+ 2 周年推出香港限定 酥皮龍蝦味薯條
Calbee卡樂B地區消息蘋地2周年零食福袋薯條
可惡呀,邊個食曬小編啲零食呀?睇嚟又要買返啲新嘅零食補吓貨啦。好彩咁啱Calbee+推出全新嘅香港店限定產品,今次小編一定要好小心咁收埋先得,唔可以再俾人偷偷地食曬。
今年適逄Okashi Galleria x Calbee+香港店踏入2周年,特別推出香港店限定產品—全新酥皮龍蝦味宅卡B薯條禮盒以及 2周年蝦哈笑感謝袋,由3月13日起喺Calbee+ 香港店獨家限量發售,各位零食控就千奇唔好錯過,而小編嘅同事就記得自己去買啦!
香港獨家發售嘅酥皮龍蝦味宅卡 B 薯條禮盒無論味道同包裝設計都非常吸引,創新嘅口味以酥皮嘅牛油香同龍蝦嘅鮮味合二為一,令人食指大動。而包裝以可愛嘅Potta小天使同龍蝦作主題,仲用咗鐵罐禮盒,用嚟收藏都喺一個唔錯嘅選擇。一盒入面有住6包唔同包裝嘅薯條,為粉絲們提供好味嘅零食之餘,仲送上歡樂嘅氣氛。酥皮龍蝦味宅卡B薯條禮盒售價為港幣79元,而每人限購4盒,售完即止。如果大家有興趣就記得把握機會購買。
除咗薯條禮盒,Calbee+仲推出「Calbee+香港店2周年蝦哈笑感謝袋」。感謝袋入面有一個限量版精美Tote Bag、卡樂B宅卡力高及宅卡B圖案杯蓋同埋卡樂B宅卡力高鉛筆(HB)。當然點少得有零食,包括:卡樂B宅卡力高沙拉味薯條 60 克及卡樂B堅薯片輕鹽味65克,仲有今次推出嘅卡樂B宅卡B酥皮龍蝦味薯條鐵罐禮盒(香港版)。而感謝袋售價為港幣168玩,但每日限量發售100件,手快有手慢就冇。
上面兩件商品都喺由3月13日開始發售,而另一款特別小食—避風塘香辣味薯片+Cremia軟雪糕。由3月1日起已經開始發售,但只賣到3月31日。有興趣嘅大家記得喺期間限定入面買嚟試試。
Okashi Galleria x Calbee Plus
地址:香港灣仔皇后大道東200號利東街地下G14-15號 (合和中心對面)
營業時間:(星期一至五) 上午11時30分至晚上9時30分
(星期六、日及公眾假期) 上午10時30分至晚上10時