政務司司長許仕仁喺三月二十日出席「十一五論壇」主辦嘅「十一五規劃研討會」上提出恐怕香港被邊緣化嘅問題，之後「邊緣化」（即係英文marginalize）一詞，掛在高官口邊，馬時亨跟住講，然後任志剛喺「泛珠三角區域金融論壇」（三月二十三日）再講，於是「香港被邊緣化」成為「流行恐懼症」，以前香港人好有信心，上到大陸扮大爺，𠵱家反過嚟，啲阿燦表哥表姐落香港掃貨，入住置地文華，買Vertu手機，香港人已經冇晒優越感，諗唔到肥龍更加謙卑，話好驚「被邊緣化」。
香港製造業早已「邊緣化」，邊緣到懸崖，碌咗落山㖭。任總裁講五個方法（任五招）鞏固香港金融中心地位，賓架陳話並無新意，以前任總已經講過，不過當時冇引起注意，呢次配合到「邊緣化」嘅討論，先至哄動。
製造業被邊緣化，對香港經濟發展全無影響，金融中心被邊緣化，就會好唔掂，一旦成為事實，IFC二期啲租金跌到落十蚊一呎都似。賓架陳大派定心丸話：「我驚都未驚過，金融中心之成立、持續，全靠軟件，硬件係次要。軟件指世界級人才、法制、獨立司法、英國式不成文法律、及會計審核操守，監管不受政治考慮及議員壓力所影響。呢啲軟件，到目前為止，香港全部齊備，上海只得一件半件，邊夠香港揮呀。」

唔係喎，上海進步一日千里，容乜易追上嚟？賓架陳講：「中國係好有進步，但在我有生之年或者到咗二○四七年，中國相信都唔會放棄共產黨一黨專政。行呢套制度，司法一定唔會獨立，證券監管受黨委書記指揮，政治考慮壓倒一切，況且中國行歐洲大陸法，而所有主要世界金融中心如紐約倫敦星加坡香港都係行英國式不成文法，證實咗不成文法或普通法比較靈活，適合現代金融業所需。改變法制，係政治頭等大事，假如中國有此一變，廢除黨委制，再冇黨大還是法大嘅爭論，我會好歡迎香港被邊緣化噃，因為到時中國已經真正現代化，我會移民杭州安享退休！」