四十八歲單親婦阿玲，與丈夫離婚後，便與現年十一歲兒子文仔相依為命，月前阿玲飽受頸椎痛楚，且影響其四肢經常抽搐乏力，經醫生證實其頸椎生了骨刺，需定期往醫院進行物理治療及服藥，並需購買復康儀器，以便隨時在家中進行物理治療，紓緩頸椎及腳患的痛楚，惟生活貧困的她，無力負擔有關費用。

「𠵱家啲手腳成日抽筋同埋麻痹，有時連着衫都要靠文仔幫我，對腳又行唔得耐，試過行街嘅時候膝蓋突然間冇力，幾乎跌低，好彩阿仔喺旁邊扶住我！」阿玲一臉無奈地歎道。

四肢麻痹抽搐
從事時裝設計十多年的阿玲，受經濟不景影響，早前遭公司辭退。失業後，阿玲曾從事售貨員、包裝工人及侍應等工作。惟受病患影響，阿玲暫未能工作，兩母子現靠綜援金維生，生活捉襟見肘。近日，阿玲除了頸患的痛楚加劇，雙手更感乏力及經常抽搐，膝蓋亦不時感到痠痛，令她舉步維艱。
阿玲愁眉不展地說：「有次瞓醒覺起身嘅時候，啲手腳突然間郁唔到，嗰時真係好驚，𠵱家瞓覺都唔敢瞓太耐，因為驚啲手腳會容易麻痹。」她表示，現時四肢隨時會突然麻痹及抽搐，曾試過卧在牀上，需要他人攙扶才可起牀；縱然是簡單的家務，她亦不能應付。阿玲盼可在家中使用復康儀器進行物理治療，待患處康復後，可繼續工作及照顧文仔起居飲食。