(新增回應)

亞視1995年喺節目《今日睇真D》播出「解剖羅玆威爾外星人」片段，一度轟動全城，亞視成功撼低當年收視常勝嘅無綫，亞視食住條水，立即製作更多相關節目，派節目主持去美國羅茲威爾做採訪，之不過冇耐就被無綫《城市追擊》推出《踢爆解剖外星人》專輯反擊，指出影片中嘅外星人係電影特技做。

製作該短片嘅58歲電視監製Spyros Melaris最近喺倫敦揭開秘密，指片中外星人屍體係由特效專家John Humphreys製作，內臟由肉檔買啲羊腦、雞內臟同豬蹄返去放入去凸眼外星嘅模型中。估唔到事隔咁耐，電視監製Spyros自爆全部係造假，又話當時只係純粹為搞笑，o依家對呢件事覺得好後悔，冇諗過啲人將影片當做外星人存在嘅證據(新聞連結： http://bit.ly/2jZkdcH )。

當年有份主持《今日睇真D》嘅歐錦棠，今日接受《蘋果》訪問時，表示當年全不知情，阿棠話：「全部唔知情，好多年前都講過係流，但o依家製作人出嚟講番，好正囉。以嗰時科技製作咁嘅道具，呃晒全世界，當時買咗呢條片返嚟好秘密，買咗條片返嚟，畀我哋上去睇咗先諗吓點樣出街。我哋睇咗係黑白片，大部份人信以為真，亦有人懷疑，但舉證唔到係假，甚至乎當年香港得一單新聞，成個星期都係講外星人，哄動到咁。嗰時唔覺係騙局，當然好多觀眾會鬧話係呃人，我哋持相反意見，我哋都唔知真定假，甚至乎同片主，唔係呢個製作人，我哋同片主視像通話，香港電視未試過，用英語訪問即時翻譯，都算係創舉。搞咁多大龍鳳，原來一鑊泡，係流嘅，咁樣好開心囉。」

阿棠再話：「當年就連亞視製作部大部分人都信以為真，有份參與傻吓傻吓。」問到阿棠可覺得當年亞視綜藝節目「揸fit人」余詠珊可知情？阿棠答：「我思疑連余詠珊都唔知，因為個個信以為真。」

至於另一主持林建明今日亦回應話：「如果係咁嘅，咪一大笑話囉，哈哈哈哈。」