窮，係咪會越嚟越窮，華華唔知；有錢嘅，就99.9%肯定會越嚟越有錢！
好似咁多年嚟買賣物業多數有入冇出、外號「貔貅」嘅科達地產主席兼資深投資者湯君明咁，簡直就係富貴逼人來，「家我所有放盤嘅貨都反價至少一成，收緊租嘅單位亦加租一成以上，俾人話我係無良業主都冇計！」
咪住先，貔貅哥上星期先話樓市就快爆煲，轉頭又話要反價，搞邊科呀？「呢排想買啲豪宅同舖位玩吓，點知一係俾業主反價反到暈，一係出到價都冇回音，睇得出個市仲好旺，家無論乜嘢貨，亂叫個價都有人出到，個市可謂百年難得一遇，所以我手上啲貨全部反晒價！」

明苑反價2億等內地客追價

貔貅哥又舉例話，好似佢嘅淺水灣道121號明苑咁，本來叫價20億，上個禮拜有個內地豪客畀到18億想買，佢傾都冇同佢傾就反價10%去到22億，等個客自己追價。至於收緊租嘅單位，就加租一成以上，但係好多租客都接受，因為明白家經濟好，加埋通脹，點都要加吓租……真係恨死隔籬。
後市又點睇呢？佢話家陣港紙唔值錢，都係揸磚頭保值穩陣啲，佢估年尾前個市仲升得到，但係出年就肯定跌，「到時一加息，加埋呢幾年增加供應嘅因素會出晒嚟，真正供過於求……」個樓市仲有1年可以玩，大家留意喇！
照佢咁講，個樓市仲有1年可以玩，之但係個重點係普遍嘅人連買磚頭嘅本都未有，邊有資格講揸磚頭保值呢？或者咁啦，大家先買隻貔貅番屋企吸吓財氣，儲吓彈藥入市，會唔會比較實際啲呢？

李華華
mailto:[email protected]