香港桌球一哥傅家俊（Marco）周一喺約克郡舉行嘅英國桌球錦標賽第三圈賽事，以4:6不敵中國20歲新星呂昊天。而其實同一個比賽日，分別有卓林普(Judd Trump)、羅拔臣( Neil Robertson)同馬克威廉斯(Mark Williams)先後都喺第三圈被淘汰，計埋之前被淘汰嘅5位種子球手，包括一哥沙比（Mark Selby）和中國的丁俊暉，英錦賽至今已經有9位種子球手被淘汰，大吹冷風。

2號種子卓林普面對世界排名第30嘅杜特，喺領先兩局下，居然畀對手連取6局，以2:6慘敗，賽後佢表示對手發揮的確比佢出色，而且「起迫」都好重。而上個月喺北愛爾蘭公開賽奪冠，結束6年排名賽冠軍荒嘅16號種子馬克威廉斯，就未能保持強勢，以5:6輸咗畀同為威爾斯球手嘅迪爾（Ryan Day)。數最慘嘅一定喺澳洲球手9號種子羅拔臣，佢除咗以5:6飲恨以外，仲因此跌出世界排名頭16，無緣下月「桌球三大滿貫」之一嘅大師賽。

至於傅家俊球迷，唔使餓好耐，今個月中Marco就會轉戰格拉斯哥，出戰蘇格蘭公開賽。今年佢會以衛冕冠軍身份出戰，希望可以再創佳績喇！

----------
係你！打造星級球隊，征服各地聯賽！立即加入『BFB CHAMPIONS 2.0』！