哈利卡尼喺星期二嘅歐聯分組賽連中三元，協助熱刺作客大勝尼科西亞3:0，今次係卡尼個人第一次喺歐聯演出帽子戲法，亦係佢喺2017年第六次「戴帽」。卡尼今年已經喺各項賽事總共為熱刺射入咗34球，係2017年為英超球會入波最多嘅球員。

另外，哈利卡尼今場入三球之後，亦成為咗第七個喺歐聯「戴帽」嘅英超球員，之前六個分別係高爾、紐維爾、奧雲、朗尼、舒利亞同埋韋碧克。