當年今日
關於我們

【李八方online】積金局主席黃友嘉 擇吉日下海寫網誌

蘋果日報 2018/03/01 20:00

黃友嘉李八方積金局

開張要擇良辰吉日,開Blog都要睇啱時機。出任強積金管理局主席近3年嘅黃友嘉,今日終於處男下海,喺積金局網站發表首篇網誌「積金‧誌」,仲要食正噚日發表嘅財政預算案,話好贊同財爺建議為強積金自願性供款提供扣稅優惠,議題夠晒新鮮熱辣,仲列出多個例子配合,難道係未卜先知?
黃友嘉喺網誌舉例指,一個25歲年輕人月入1.55萬元,往後40年連同僱主供款,每月合共供款1,550元。假設強積金年率化淨回報為2.0%,以今日價值計算,佢65歲退休時可提取嘅強積金總額約114萬元,直至85歲期間,每月就有4,700元收入。如果每月再額外供款500元,退休後每月就有6,300元,多收1,600元。
黃友嘉明白好多人都擔心「臨老過唔到世」,強調退而無憂單靠強積金唔夠,但指相比零售基金,強積金基金冇買賣差價、冇收取認購或贖回費,唔少股票基金嘅開支比率都低過1%。佢仲話及早做好退休儲蓄,就離退「優」生活目標更近。
今時今日,一篇網誌,真係勝過萬語千言。好似勞工及福利局局長羅致光(CK)就鍾意親筆寫blog,八方唔少行家成日要追看,因為睇完就好似上完一堂大學lecture,學到唔少嘢,有時仲有唔少火花。八方認為黃友嘉都可以向CK偷吓師,寫得人性化,不時風花雪月,如果唔係大家就當咗係一般新聞稿,吸引力大大減低!