北京統戰部女部長劉延東，喺香港展開統戰活動，發表統戰講話，八方列席，聽咗之後，覺得呢位東東真係好了解特區實況。
東東重點統戰有錢佬，話香港靠晒商人。佢重話中有話，向有錢佬面授十六字真言：「敢為人先，愛拼會贏，通權達變，敏行善斷」。
呢四句佛偈，點樣解籤？八方請教完一啲接近中方權力嘅人士，先至聽得明。所謂「敢為人先，愛拼會贏」，係間接不滿香港工商界，點解跟阿當奴去咗一趟大西北之後，落番嚟淨係識吹水，一個仙都冇到。投資大西北，包括寸草不生嘅甘肅黃土高原，特區工商界唔敢為人先，「愛國」要講行動，對於工商界來講，有冇水到，就係唔敢拼，又點會贏？工商界唔好扮儍，當東東呢句說話係唱K。
不過，民主派聽到亦好興奮，佢哋最鍾意「愛拼會贏」呢一句，九月選舉一定鑊鑊拼到底，贏到盡，保證唔令東東失望。