李道洪是70年代無綫劇御用的花花公子，《網中人》一劇中飾演的奸角阮其昌，報警令虧空公款的周潤發入獄，形象鮮明。不過，要數李道洪真經典，絕對是由他、洪羅拔和周美鳳主持、播足四年的成人節目《活色生香》。

於上海定居多年的李道洪，日前受訪時表示：「監製話我形象咁playboy，有個節目好啱我，就係《活色生香》，教大家酒色財氣，早期係叫《男人世界》。」不過節目首三個月反應平平，後來延後播放時間，收視才升。「最初時段唔啱，係夜晚8點至9點，不如去盡啲，當成人節目嚟搞，10點半先播，播到12點，後來你見到我哋可以提避孕丸，又可以講性病、脫衣舞、婚前性行為，請醫生上嚟傾，變咗專題節目，做吓做吓搶到收視冠軍，我記得我哋收視係四台同一時段之冠。」

談及性健康之外，《活色生香》還走到各大夜總會拍攝男士們的花花世界，開創電視節目先河。李道洪說：「嗰啲係我擅長，嗰時我幫一隻白蘭地做宣傳，我同隻酒個總經理好熟，本來佢哋請我拍酒廣告，我成日落club拍外景同埋同佢哋做活動，我就諗，不如你哋做我sponsor，兼搵埋nightclub，所以啲中國城、大富豪、大都會老細全部我識晒，我同佢哋講不如贊助我，有脫衣舞有乜我嚟拍，總之我打格仔。」節目越做越hit，hit到衝出香港到泰國、菲律賓，甚至埃及、巴西等地拍攝夜生夜。

夜場品流複雜，李道洪最難忘在菲律賓的經歷：「我哋離開咗馬尼拉去咗另一個城市拍，品流比較複雜，有人吸大麻，好色情節目可以睇到，有刑警朋友保護本來以為冇事，但有次啲刑警朋友叫我哋快啲走，聽到街出面有槍聲，佢哋話好似掃場，叫我同司機喺後門走先，佢哋去維持治安，第二日聽到原來係當地兩幫黑社會火拼，打咗四十幾槍。」李道洪遊遍外地夜場，那麼他應該「食」勻全世界吧？他聞言哈哈大笑說：「我哋有旅行社、旅遊局贊助，唔可以影響image，仲有係每次我哋都帶女主持去，啲女主持全部亞姐嚟，我唔可以喺亞姐面前失咗哥哥身份。佢哋個個好尊敬我，叫我Mr. Lee！唔係話我乖，而係我好驚返到嚟畀人唱。仲有一樣嘢，嗰陣時愛滋病好流行，嚇死人㗎，千祈唔好走埋去呀。」

李道洪強調雖然經常到夜場工作，又曾投資過卡拉OK，但自己不愛飲酒，不愛在夜場流連：「尤其自己係一個咁樣嘅job，就更加要錫身，通常我唔喺夜場蒲，反而拍完我就走，唔會喺度玩。要錫身同好小心啦，我寧可談情說愛交女朋友，都唔敢周圍食野味。」

談情說愛的結果，為李道洪換來兩段婚姻。他的前妻是梁小玲，亦即是無綫「御用癲婆」趙希洛的母親。「我哋係好早期一段婚姻，可以話誤會而結合，了解而分手。麗的時間認識，跟住我哋拍檔，跟住我哋唔合就離婚，前後都有四年。74年結婚，78年離婚。」退出娛樂圈多年的梁小玲，是李道洪麗的訓練班師姐。梁小玲鏡頭前飾演情婦、二奶角色，但李道洪透露，其實她早已厭倦娛樂圈這個花花世界：「佢一路喺電視做咗好多年，但其實佢係一個好純樸嘅人，佢唔慣影視圈嘅虛偽圓滑，我哋影視圈鍾意埋堆，佢又唔埋堆，唔鍾意太多應酬，而我係幾喜歡埋㗎，譬如同發仔（周潤發），我哋收工會一齊去消夜。」

梁小玲除了不喜歡應酬，希望李道洪轉工也是二人離婚原因之一。李道洪苦笑說：「我讀書係讀理料，跟住去台灣讀土木工程，佢認為我應該做工程師，但你台灣讀書，喺香港係唔到牌做工程師。我認為電視條路啱行，但佢認為條路唔啱行，我哋為呢件事拗咗足足四年，拗到我喺台灣紅咗，佢都唔接受呢件事。」跟前妻再見亦是朋友嗎？他說：「再見有打吓招呼，因為雙方有不同家庭，唔希望有另外一個誤會，只有《歡樂今宵》聚餐時大家見一見。」

李道洪於96年在亞視版本的《我和春天有個約會》飾演白浪哥，劇集在內地反應熱烈，帶挈李道洪在內地長搵長有。99年尾，他娶了比自己年輕21歲的上海姑娘為妻，「到咗我呢個時間年紀漸大，我希望家庭為主，所以由我大仔出世之後，我就減少工作量。」兩人育有18歲大仔Winston和14歲細仔Victor，兩子漸大， 李道洪坦言有興趣回歸拍港劇：「今年我同亞視無綫接觸番，有啱嘅角色劇本，我好有興趣返嚟。」