兩男一女加埋就等於個嬲字，唔知兩女一男，出到嚟個效果又係點呢？

大台劇《深宮計》大隊上個月去咗橫店開工拍外景，有份拍嘅蕭正楠之前單思病發作，寂寞難耐要出到「尋人啟事」搵女友翠如BB。蕭正楠唔似得馬國明咁，喺橫店拍劇都有緋聞女友心穎BB常伴左右，噚晚套劇終於煞科，心穎BB就喺微博貼咗成班藝人聚埋一齊食煞科宴嘅相，順便同壽星仔韋家雄慶祝生日。

相中只見馬國明一直黐實心穎BB，視線亦無時無刻跟實女友，再望真啲張相，原來馬明前度胡定欣就企正心穎BB隔籬，不過新歡舊愛企埋一齊，都似乎冇乜尷尬，個個仲笑得好開心㖭！其中一張相，心穎同定欣仲齊齊搽啲cream落壽星仔塊面度，睇落又真係冇乜芥蒂喎！